Entrada a YuyuanGardens en Shanghai
Fa alto u baixo un anyo tenié a oportunidat de viachar enta China. Un viache laboral que dificilment se podría haber feito estianyo, y de seguras va a estar de difícil organizar d’aquí enta debant. No nomás por as dificultatz de movimientos provocadas por o COVID19, sino tamién por as restriccions d’un gubierno chino que ya antes d’esta crisi teneba o Control como l’alazet d’o suyo gubierno. Una población encerpada que pa bien u pa mal ha aduyau a China a salir d’esta pandemia, con menos muertos, pero talment con un poco menos de libertat d’a que teneba, y con menos privacidat. Quereba analisar este control cutiano que o Gubierno exerce sobre @s ciudadan@s chin@s.
O Visau chino constaba ya fa 1 anyo d’un mes de tramitación. As zagueras noticias d’ixe mesmo Visau, chusto antes d’esclatar o COVID19, yeran que os demandants heban d’ir ta l’Embaixada de Madrit pa poder conseguir-lo.
Si ha quedau clara una cosa en esta crisi son as trazas y o modelo d’enrestir esta pandemia d’o gubierno de Xi Jinping. Un ferreo control de movimiento, empecipiando por a zona 0 de Wuhan, y un seguimiento de toda la población que dificilment hese puesto acometer qualsiquier atro gubierno que quiera rispetar minimament as leis de privacidatz, ya de por si muit mermadas en Europa u Norte d’America.
En o mío caso viachaba enta Kunshan, 1.651.000 habitadors, en a redolada de Shanghai. Una ciudat d’a China semi-rural, venida a mas en os zaguers 20 anyos, dende que interpresas foranas plenasen os suyos poligonos industrials.
O trachecto de bella hora y meya fa una ideya d’os meyos de Seguridat, totz ells mimetizaus en un tarabidau infinito de Vías de Comunicación y transportes, d’una d’as mayors Acumulacions Metropolitanas d’o Mundo (Shanghai- 23.390.000 millons d’habitadors), que nos va a encorrer mientres tot lo viache por a rechión.
Podríanos dicir que ye a primera vegada que veigo un País prenendo-se en serio a famosa Achenda 2020, a lo menos de cara ta o publico. Tot y que camions y Industria plenan o paisache, a distribución de matriculas azuls pa Autos de Combustión Interna y Verdes pa Electricos nos fan a bienvenida en terminos de transición ecolochica. En realidat, l’acceso a ixas matriclas no ye fácil, y no toda la población puede conseguir-las.
A china rural se mezcla con as autopistas que han modificau o suyo paisache. De vez que as carreteras de tres carrils, nos trobamos l’atra realidat china; os miles de treballadors que van a diario ta o suyo puesto de treballo en moto electrica u bici.
I hai una dicienda entre os foranos/as expatriados que treballan en China: “Iste país ye esdevenindo uno d’os mas desgallinaus d’o mundo. Pero a población ha experimentau o mesmo creiximiento en 20 anyos que Europa ha puesto experimentar en 100. En as oficinas no ye de díficil trobar chent choven, que en casa suya remeren no tener escusau”. Chent, en gran parte, venida d’o meyo rural.
Carretera Kunshan-Shanghai
As motos electricas son subvencionadas por o gubierno chino, todas iguals, todas en ringlera a treballar, pa que tot aquel que no pueda permitir-se un Auto (en son muitos y a burocracia pa tener-ne uno ye larga y cara) también pueda arribar-ie. Choca ixa imachen de tres carrils quasi vuedos, en contraste con os entrascos de Shanghai. A la dreita de l’autovía un carril paralelo pa motos, acaramullau de treballadors, totz fendo o mesmo rudio de moto electrica cara ta o suyo puesto de treballo. Ye a sintonía d’o control, de l’orden y as directrices d’o gubierno con os mas pobres. Se podría dicir que esta subvención ye atro metodo pa cusirar o gasto, y a elección en o fabricante de moto d’as treballadoras.
Kunshan- Poligonos Industrials
Aparcamiento pa bicis en as plantas de fabricación, plenas de motos electricas
O control ye una d’as falagueras d’o gobierno d’o Partido Comunista chino. Dende internet, pasando por móvils, camaras, Canals de televisions,…
A deleria d’os treballadors foranos d’estos Poligonos industrials por comunicar-se con o mundo occidental, les leva a fer servir Aplicacions de móvil VPN (Virtual Private Network) como VyprVPN, que han de trayer descargadas d’Europa pa poder conectar-sen a Facebook, Whatsapp, Instagram, Twitter, … y una ripa de periodicos y meyos con os que gosan informar-sen. O fin d’estas aplicacions ye contectar-se a retz d’internet no contraladas ni vedadas por o gobierno chino.
Un paseo por as zonas mas comercials d’o centro Shanghai como son os YuyuanGardens (foto d’alto) u a carrera Nánjīng Lù fa una ideya d’a vichilancia a la que os movimientos d’a población china ye sometida.
Carrera de “compras” Nánjīng Lù en Shanghai, una d’as mas largas y concurridas d’o mundo
As modernas camaras se mimetizan a tot l’arreu d’edificios tradicionals en o centro de compras de Shanghai. Entre os treballadors foranos con experiencia en o país siempre se sienten atra vegada historias, como “a d’un amigo que se brincó un semáforo a piet, y recibió a los días en casa a notificación d’a multa con a foto”.
Ciertas u no, son historias que aduyan a comprender a psicosis colectiva d’este país y o gubierno por o encerpar la suya población. Nomás fa falta una gambadeta por os restaurants y botigas de YuyuanGardens pa comprobar a monitorización, también economica, d’a población china. Unos simples pagos de “cena pa levar” serán automaticament feitos con l’apliación de moda en china “Alipay” (u “WeChat” mas pa facturas u retz socials) deixando-te, por si encara no i heba dubdas, como un autentico “giri” en sacar o tuyo sobre de billetz de “Yuans” recient trayius d’o banco.
Pago en un restaurant chino con l’aplicación móvil Wetchat
O gubierno sabe en tot lo momento án yes bosando, qué yes mercando, a tuya cheolocalización, qué te yes mirando por internet, por qué carreras vas caminando, si yes incumplindo bell confinamiento ….
Por si a restricción a Whatsapp, Facebook u Twitter no estase poca, as cosas s’embolican quan en o tuyo treballo diario t’apercazas de que Google no funciona en China. A conseqüencia mas directa ye l’emplego d’a suya alternativa china “Baidu”, que fa de ferramienta de busqueda, pasando por o filtro gubernamental. O mayor buscador d’o planeta, no ye accesible dende China! A interpresa estadounidense abandonó lo país en 2010 en refusar as estrictas normas sobre control de conteniu.
En o poco tiempo con o que cuentas pa foter-le una gollada a la televisión china, en bell meyo d’un restaurant u café, t’apercazas d’ixas diferents trazas de refleixar a cheopolitica internacional. O viello bloque de l’Este, encara que cada vegada menos comunista, sigue d’actualidat y marca l’achenda informativa china. Nomás as charradas de politica a escuchetes son permitidas en restaurants y cafés. De nuevas, as historias entre treballadors foranos cuentan que “a opinión cheneral d’a población ye que o gubierno chino no ye a “panacea” a totz os suyos problemas, pero ha traito o progreso ta China”, “no saben qué pasaría si se fesen eleccions y dentrase atro partiu en o gubierno que no estase lo comunista, pero países d’o suyo arredol como India son un buen eixemplo de pobreza a o que no quieren plegar”. A oposición a o gubierno chino entre charradetas de café u transporte ye muit mal vista en China “se diz que qualsiquier persona con a que charras puede tener contactos con o gobierno, y de camín te pueden apercazar u acusar de conspiración”
Retransmisión d’a cumbre China-Rusia en Moscú Junio’19 en a tavierna d’un Hotel de Shanghai
A realidat urbana d’hotels, cadenas de restaurants de “Dumplings” (agora ya no se claman “jiaozi”) , … choca con a gran china rural, que agora vive en barrios obreros en os suburbios de Shanghai, Beijing u Kunshan.
Aquí a cocina tradicional china, se mezcla con os animals vivos en barrenyos, as virigüetas y cucos fritos, y as peceras de peixes prestos pa estar minchaus. Ye aquí an que os pagos con movils no s’estilan, a las personas occidentals se les mira como extranyas, … y o control d’o gobierno chino no plega a estar lo d’as rectrivas y futuristas midas d’as grans ciudatz.
Zona de bars y restaurants d’as afueras de Kunshan
Ye difícil cambiar una población de 1.400 millons d’habitadors, que en menos de 20-30 anyos ha sufriu una d’as revolucions industrials mas potents d’os zaguers sieglos, y que viene d’una d’as culturas milenarias tradicionals mas influyents d’as Edatz d’o Ser Humano.
Hespital chino de Shanghai con medicina integrada occidental-tradicional china
Son impresions, experiencias y analisis que quité mientres bells días d’estancia en Shanghai y la suya redolada. Prou que a perspectiva pende d’o país d’an que vienes, y todas istas conlusions no serán las mesmas pa un asiatico de Malaisia, Vietnam u Bangladesh.
He seguiu l’actualidat china con especial intrés dende este viache, y en esclatar a crisis d’o COVID19 en Wuhan. Os control pa dentrar, moverse u vivir en China han esdeveniu encara mas restrictivos d’os que yo vivié. No dubdaba en que iban a ir a mas.
Me percute de tot, a zaguera convinación de tecnolochía y control chino con l’aplicación “CULVERDAVID”, que te permite entra en un local comercial u de ocio, una vegada que pasas o tuyo móvil por un lector, qui calcula a exposición que has puesto tener a o COVID19 en as zagueras horas. Pendendo d’o color con o que se marca o DataMatrix, podrás entrar, mercar u fer servir ixe establecimiento en prevención de nuevos contachios.
ospaisachesde 