Maine (USA)
Una gambada por a toponimia colonial d’a costa de l’Estau de Maine (USA) me fa preguntar-me o porqué d’as diferents denominacions d’un mesmo accident cheografico. En iste caso d’o romanico “puerto/porto/Port” que veyemos en lugars como “Rockport” u “Bucksport” d’a costa de Maine.
Manimenos a solución “Harbor” tamién ye ampliament emplegada en o dominio anglés, pa puertos d’atraco de grans barcos, y ascape nos vienen imachents como la de “Pearl Harbor” en Hawaii. O vocabulario d’Oxford lo traduce como “puerto con dreitos”-“refuchio” u “albergar”. Y prou que tamién ye feito servir en a costa de Maine, en toponimos como “Pulpit Harbor”, “Bar Harbor”, …
Pero ye o tercer toponimo “Haven” o que mas intriga me dispierta. Seguntes o vocabulario d’Oxford ye literalment un sinonimo de “port”, pero como principal significau ye “refuchio, cubilar”. En Maine trobamos toponimos como Vinalhaven, Northhaven, …
Vinalhaven (Maine) USA
D’orichen chermanico y ampliament emplegau en atras luengas chermanicas como l’alemán “Hafen” i.e.: “Ludwigshafen” d’interior u “Hamburg Hafen” en a mar, neerlandés u sueco “Hamn”.
Fa poco leyeba un filo sobre un purismo lingüistico clamau “Anglish”. En ell, s’abogaba por eliminar toda parola d’orichen forana no-chermanica d’a luenga anglesa, y incorporar a o lexico común parolas exclusivament chermanicas.
Pa empentar ista faina seguiban ista linia. 1) Revilcar chermanismos obsoletos en a luenga anglesa (parolas en anglés medio u antigo) 2) Adaptar parolas de l’anglés antigo pa neolochismos. 3) Si fallan 1 y 2, fer servir prestamos d’atras luengas chermanicas (airport-flyhaven; station-standstead; telephone-farspeak; televisión-farsee; parm (baby carriage-childwain); psychology-soullore; geology-earthlore; ferrous sulphide-ironish brimstoneling).
Iste movimiento no ye moderno, pues tien muitos antecedents. Escritors como George Orwel en o sieglo XX yera un gran desfensor d’o purismo lingüistico, y recomendaba fer servir parlas sajonas en cuentas de parolas d’orichen griego u latino.
En opinión de muitos expertos ista tendencia ye un error, ya que precisament lo que fa unico a l’anglés, y mas asequible, ye a diversidat lexica, fruito d’o contacto con atrás culturas y luengas a lo largo d’a suya historia. Antimás, una luenga dominant, no precisa d’un filtro purista, pues no ye en periglo de perder a suya idiosincrasia como sí lo están luengas minorizadas, que sufren a embestida constant de luengas dominants que las minorizan u invisibilizan.
Maine (USA)
Un buen eixemplo d’una luenga no minorizada, pero si mas minoritaria que l’anglés, seguindo tamién esta linia, sería l’alemán.
Unatro eixemplo, en iste caso d’una luenga minorizada, sería l’euskera. Tot y que Sabino Arana, uno d’os creyadors d’o nacionalismo vasco, a’l contrario d’o que la chent piensa, abogaba por una ortografía común pa l’euskera, pero salvaguardando a diversidat dialectolochica pa cada provincia, tratando-las como luengas. Yera partidario de sacar prestamos foranos romanicos, y substituyir-los por unos neolochismos comuns, muitas vegadas inventaus por ell.
Deun (santo), txadona (iglesia), orlegi (verde), urrutizkin (teléfono), izparringi (periódico)
Un zarpau d’istos nuevos neolochismos han plegau dica l’euskera batua actual.
Tornando enta l’”Anglish”, una d’as primeras parolas eliminadas por esta tendencia, en estar d’orichen romanico, sería “Port” y as suyas derivadas. A sustituta chermanica sería “Haven”, en consonancia con a resta de luengas chermanicas.
L’emplego de “Haven” en a parla oral anglesa, mas que mas en America, ha quedau fosilizau en toponimia, y en significaus muit concretos asociaus a “refuchio-cubilar”. “A place of safety or refuge”. “Australia was one of the world’s havens for refugees”.
En zagueras se ha puesto sentir de nuevas este lexico d’orichen chermanico, popularizau
por a famosa canal pro-Trump “FOX”. En ellas s’apela a las libertatz de ciudatz californianas que fan caso omiso a las restriccions a “sin papels” que Trump leva empentando dende la suya arribada a la casa blanca.
O 25 de chinero de 2017, Trump ordenaba a construcción d’un muro en a buega entre Estaus Unius y Mexico pa impedir a entrada d’inmigrants indocumentaus dende America Latina. O muro encara no se ha empecipiau a construyir, debiu a que no i hai fondos pa pagar-lo. Iste y atros feitos como a intención d’USA de renegociar o Tractau d’o Libre Comercio d’America d’o Norte, afectoron as relacions entre USA y Mexico.
Maine (USA)
En abril de 2018 o Fiscal cheneral d’USA, Jeff Sessions, anunción a implementación inmediata d’una “politica de cero tolerancia” debant de qualsiquier ingreso ilegal a o territorio d’USA. Y esto incluyiba a separación d’as familias si ye que mientres o cruce ilegal yeran acompanayadas por ninos/ninas dica 13 anyos.
A situación d’incertidumbre y miedo chenerada entre a gran población emigrán americana han feito descender os viaches de visita a la familia enta o país d’orichen, os desplazamientos entre estaus, en avión, … la mas minima sospeita chenerada por o concieto d’o policía federal de turno, te puede fer pasar por comisaría, prisión y estar expulsau d’USA.
Fruito d’ista “politica de cero tolerancia” a patrulla fronteriza, y qualsiquier policía tot arreu d’USA, empecipiaron detencions d’inmigrants. Istos yeran apresaus mientres 72 horas, dimpués os adultos yeran acusaus y separaus d’os ninos/as, y istos zagueros yeran ninviaus a diversos centros de detención en o país.
S’estima que más de 2000 ninos y ninas han estau separaus de sus pais y mais en iste proceso. Os ninos yeran colocaus prisions ubicadas en almacens, en muit malas condicions. A iste cal adhibir l’estrés, desorientación y trauma por a separación forzada de sus pais.
Miembros d’o partiu democrata, o secretario de relacions de Mexico y mesmo o papa criticoron ista separación de familias.
Ciudatz como Los Angeles u Sant Francisco, con una ampla tradición demócrata y con buena cosa de población emigrant, han estau criticadas dende los mass media y politicos republicanos por la suya flexibilidat y belicherancia respecto a l’expulsión d’emigrants, y separación de familias. Los que les ha feito ganar-se l’apelativo de “Free-Haven” u “ciudatz refuchio d’os sin papels”.
Uno d’os puntos an que un país refleixa la suya traza d’entender a inmigración, ye la 
rapidez con la los suyos residents naixius de fuera, son incorporaus a las listas de votants.
Países como USA ( u i.e. Australia) son famosos por as suyas politicas restrictivas d’acceso a ixas listas. Deixando a un costau a personas discapacitadas mentalment, con antecedents penals, d’orichen forano, …. asegurando-se asinas cotas de voto republicano y anti-emigración.
Ciudatz como Sant Francisco han implementau midas pa favorecer o voto a la población inmigrant ilegal, en as eleccions locals. Pero Sant Francisco no ye a primera ciudat con una mida d’ista mena, ya que en Maryland, an que aproximandament o 15% d’os residents son naixius en l’extranchero, unas seis ciudatz permiten que os inmigrants ilegals voten en as eleccions locals.
A experiencia dice que ixas “bolsas” de población ilegal no arriban a exercer o dreito a voto, por miedo a que a policía pueda fer listas negras de población ilegal localizada. Manimenos ye un buen signo que denota l’actitut d’os “Free-Haven”.
Estaus como lo de California en a costa Ueste, u Maryland, siempre se han caracterizau por a suya tendencia “Democrata” y flexible a l’emigración. Ex-presidents californianos como Arnold Schwachzeneger mantiene una dura baralla en os medios contra Trump, i.e. en a luita contra o cambio climático. Pero iste ye atro tema… que podremos tractar en atra experiencia viachera…
ospaisachesde 